Завгүй ажиллах ба зорилготой ажиллах хоёрын ялгаа

Миний хувьд сүүлийн 8 жил инженерингийн байгууллагуудад менежементийн чиглэлээр дагнан ажиллаж байна. Энэ хугацаандаа консалтинг болон гүйцэтгэгч байгууллагуудад хяналтын инженерээс төслийн удирдлагын газрын дарга хүртэлх албан тушаалуудад ажиллаж нийтдээ бүтээн байгуулалтын салбарт 20 орчим төсөлд оролцжээ.

Ингэж ажиллах хугацаанд нэг зүйлийг ажигласан нь зарим байгууллагууд ажлаа маш хялбараар хийж, ажилтнуудаа илүү тав, тухтай нөхцөлд ажиллуулж байхад зарим нь хамгийн хүнд, хэцүү арга замаар, маш их ачаалалтайгаар ажиллаж байгааг анзаарсан. Миний ажигласнаар зарим байгууллагуудын хувьд цалингийн хэмжээ нь бусдаасаа ялгагдахгүй боловч хийх ажлын хэмжээ нь асар их эсвэл бага байдаг жишээтэй олон удаа таарсан.

Жишээ нь өдөр тутам яаралтай гэсэн тодотголтой, ажлууд ар араасаа орж ирдэг, ажил, үүргийн хуваарилалт замбараагүй бөгөөд зарим алба хэлтсүүд нь цайндаа орох завгүй ажиллаж байхад нөгөө хэсэг нь хийх ажилгүй гиюүрч суудаг байгууллагуудтай та лав өмнө нь таарсан биз ээ.

Гэтэл эсрэгээрээ ажлуудаа эрэмбэлэн, чухал, яаралтайгаар нь ангилдаг, ажлын уялдаа холбоо сайтай бөгөөд нэг ажилтнаас хамгийн өндөр үр дүнг гарган авч чаддаг, чухал гэж үзсэн цөөн тооны зорилт тавьж, түүндээ хүрдэг шилдэг байгууллагыг ч гэсэн та харсан эсвэл түүнд ажиллаж байж болох юм.

Тэгэхээр энэ 2 төрлийн байгууллагыг юу ингэж ялгаруулаад байна вэ? Яагаад манай улсын бүх аж, ахуйн нэгжүүд 2 дахь шиг сайн байж болохгүй гэж? Гэсэн асуулт гарч ирнэ.

Миний хуримтлуулсан туршлага, судалгааны хүрээнд үүний хариулт нь тухайн байгууллага ирээдүйг чиглэсэн хөгжлийн ажлуудаа орхигдуулан, өдөр тутамд гарч ирсэн чухал болон ялах шалихгүй бүх ажлуудыг нэгэн зэрэг хийх гэж байдаг хүчээ зарцуулдагт оршиж байгаа гэж үзэж байна.

Энийг би яагаад итгэлтэй хэлж чадаж байна вэ?

Учир нь олон тооны жижиг дунд байгууллагатай хамтран ажиллаж, харилцсан практик үр дүнгээ амжилттай болон амжилтгүй яваа компаниудын чиг үүрэг, зохион байгуулалттай харьцуулахад энэ хариулт гарсан юм.

Үүнээс үзвэл хэрэв та илүү тав тухтай хөдөлмөрийн нөхцөл бүхий ажлын байр, компанийг хүсч байвал өнгөрсөнд хийдэг байсан өдөр тутмын ажлаа хийхээс гадна тухайн компани өөртөө шинэ зорилго тавьж, түүндээ хүрдэг болох шаардлагатай юм.

Харин зорилго тавьж, түүнд хүрэх гэдэг нь менежментийн суурь ойлголт байдаг билээ. Менежментийн маш олон арга, техник, салбар, загварчлал байгаагаас өнөөдөр би та бүхэнд өөрийн ажилд хэрэгжүүлсэн PDCA буюу демингийн процессын тасралтгүй сайжруулалтын циклийг сонирхуулъя.

PDCA гэдэг нь англиар Plan – Do – Check – Act гэсэн утгатай бөгөөд төлөвлөх, хийх, хянах, сайжруулах гэсэн мөчлөгийг илэрхийлнэ. Мэдээж энэ цикл нь ямар нэгэн өмнөө тавьсан зорилгод хүрэх хүртэл тасралтгүй давтан явагдана.

Энэ мөчлөгийг маш энгийнээр тайлбарлавал аливаа ажлыг хийхийн өмнө баг дотроо ярилцаад яаж хийхээ тохирох, түүний дараа өөрийн дааж авсан үүргийг гүйцэтгэж, түүнийгээ нотлоод хэрэв алдаа доголдол үүссэн бол хэрхэн сайжруулах талаар дахин нэг удаа ярилцаж, өмнөх циклийг дахин давтан хийх замаар улам гүйцэтгэлээ сайжруулах тухай юм.

За тэгвэл бодит байдал дээр дийлэнх тохиолдолд бид ямар нэгэн ажлыг хийхийн өмнө заримдаа төлөвлөдөг боловч гүйцэтгэснийхээ дараа түүнийг хэмжиж, зөрсөн хазайлтыг тодорхойлохоо орхигдуулдаг бөгөөд үүнээс болж анхны төлөвлөлт биелсэн эсвэл биелээгүй нь тодорхойгүй явсаар ажил замбараагүй болж хуй салхи үүсч эхэлдэг. Мэдээж хэмжээгүй учраас өмнөх төлөвлөлтийн алдаа эсвэл гүйцэтгэлийн түвшинг мэдэж чадахгүй иймд өөрийн ажлаа сайжруулах арга хэмжээг үр ашигтай авах боломж бүрдэхгүй билээ.

Хэрэв та PDCA циклийг ашиглаж эхэлбэл бид заавал эхнээсээ төгс, төгөлдөр төлөвлөлт гаргах шаардлагагүй болохыг ойлгоно. Өөрөөр хэлбэл PDCA цикл нь өөрөө тасралтгүй сайжруулалтын мөчлөг учир та эхний төлөвлөлтөө аль болох алдаагүй гаргаж, харин туршиж үзсний дараа хурдан хугацаанд түүнийг засах арга хэмжээг авах замаар амьд төлөвлөгөөг бий болгох боломжтой.

PDCA циклийг ашигладаг байгууллагууд төлөвлөгөө гэдгийг ганц удаа ч юмуу боловсруулаад орхидог бичиг цаас төдий ойлгохоос илүү дахин дахин давтагдаж, илүү төгс болоход чиглэсэн процесс гэдгийг ойлгосон байдаг. Нэгэнт үүнийг ойлгосон учраас тэд үүнийг өөрийн ажил болон хувийн амьдрал дээрээ ч ашиглан улам бүр өсөж, хөгжих зуршилтай болдог. Ингэснээр та хуй салхи буюу өдөр тутмын жижиг, сажиг ажлуудаа анхнаасаа төлөвлөн, юуг хийх, юуг хийхгүй байх талаар шийдвэрийг тухай бүрт нь гаргах нөхцлийг бүрдүүлнэ гэсэн үг юм.

Миний хувьд энэ өөрлөлтийг за түүний үр дүнг яг өөрийн биеэр мэдэрсэн учраас өшөө олон хүмүүс маань энэ концепцийг харж, асуудлаа дүгнээд илүү бага үйлдлээр, их орлого олох боломжоо ашиглаасай гэж хүсч байна. Та PDCA циклийн талаар илүү дэлгэрэнгүй мэдээллийг авахыг хүсвэл ISO -н удирдлагын тогтолцооны стандартуудыг судалж болох юм. Аль эсвэл манайхаас санал болгож буй, таны цаг завыг хэмнэх зорилготойгоор үзүүлж буй коучинг үйлчилгээг сонирхоод үзээрэй.